خسخس
احنا جيل بيوصل جيل
وكل جيل بيلعن جيل
والجيل اللى جاى
راح يسرح كله بمناديل
يا راضى ارضى بالنصيب
واياك تفكر أو حتى يخطر
فى بالك أنك
انسان سعيد
يمكن لأنك
مصرى بدمك
يبقا مصيرك الحديد
عايز تقرر
يابنى غيّر
وكلمنى
من بعيد لبعيد
أنا خايف يابنى على ولادى
أربعه بيقولولى يا دادى
أصل ده طبع أجدادى
نتكاثر ونمشى جوه الحيط
وكمان خايف على سوسو مراتى
فى بطنها واد
بكره يقولى يا دادى
مين راح يعلمه سلو أجدادى
يدور فى ساقيه زى الجواميس
عيل نادانى
يابا نفسى
أجيب قميص
يابنى مفيش
وأوعاك تقول
فى يوم عليا
انى خسيس
خسخس
من التخسيس
ولا كلمة من الخسيس
بتفيد دايما تهليس
توشكى وغيرها
وقناة سويس
دخل لمصر
يا رب يا مغيث
دى مليارات رايحه جاية
والاسم قال
على شحنة فوانيس
عيل نادانى
من تانى يابا
هاتلى جزمة
رديت عليه
يابنى ليه
ملهاش لازمة
البس يابنى بالقديمة
وأقنع نفسك
أنها جديده
كل اللى راح يشوف شكلك
هيقولك
مبارك يابنى عالجزمة
64 comments:
كان نفسى اقول معاك
مبارك على الجزمة
بس لو قلت كدة يبقى أنا تحت الجزمة
معلش ياعم يوسف أصلنا شعب مابياكلش غير بالقديمة وبرضة أخرس ميقدرش يقول أأأأة
مش مهم تعال انا وأنت نقول اه مع بعض اتفقنا
شكرا على مرورك يا باشا
مبروك ع البلوج يا يوسف
:)
الله يبارك فيكى يا ميرو
أنا متابع اللى بتكتبيه على فكرة
حلوة جدا وبسيطة
بس الجيل اللي جاي مش هيلاقي المناديل عشان يسرح بيها
ومعاك حق
طبعنا بقي نخلف ونمشي جنب الحيط ونربي العيال
أنا قريت اللي إنت كاتبه
وعجباني كومبارص جدا
ومبارك يابني ع الجزمة
قصدي ع البلوج
تحياتي
alien
شكرا على مرورك يا باشا
على فكرة أنا ماليش فى الجزم نهائى مبرشحهاش لحد أنه يلبسها
انت كمان عندك 4
ربنا يخلي يا دادي
لا والله أنا لسه زؤنن مفيش أربعات ولا تلاتات ده بسه حاجه لزوم الكأبة
اهم حاجه الجزم بعدين الشعب ميتوصاش حضاره وايه سبة الاف سنه جزم ... تحياتي لك ولمدونتك
فكرتنى بإيمان بكري لما بتقول خسخسوا ايه و مصمصوا ايه ؟ شفافية .. مفيش حاجة
ازيك يايوسف
ده اول تعليق ليا في مدونتك الجميله و احب اقولك ان احلي حاجه فيها هي البساطه
تحياتي
خسخس
احنا جيل بيوصل جيل
وكل جيل بيلعن جيل
والجيل اللى جاى
راح يسرح كله بمناديل
ايه الكلام الجميل يا يوسف بس اوعى تطلع من بيتكوا الايام دى
أنا كنت هنا أول واحده, بس معلقتش عشان كنت نازله.
بجد حلوه جدا يايوسف, وفكرتها بجد جميله أوي, ربنا يوفقك.
ibn-nasr
صح الجزم عليها عامل كبير عشان لو جوعنا ناكل بيها
صدق انيس لما قال:
الدنيا دى كلها من اولها لاخرها جزمة قديمه
regards
sharm
ميرسى شرم على مرورك وانا بحلم معاك بالعلم اللى أنت صممته
regards
دوللى
أحلى حاجه فى مدونتى هو وجودكم فيها لأن ده اللى هيخلينى استمر فى الكتابة
regards
sendrlla
أحلى شخصية حبتها فى الكارتون هيا سندريلا وتويتى تصدقى من ساعة ما كتبتها وأنا عيان الظاهر ان اللى ييجى على الجزم عمره ما يكسب
regards
ساسوووووووو
أخيرا جيتى كنت مستنى تعليقك كالمعتاد أول واحده ياللى ناصفانى دايما بس ولا يهمك
regards
Hello!
Thank,s for you work and have a good weekend
هتوحشنا
D:
david
thx alot
shabf2ree
يا عم خليها على الله انت مبتجيش ليه مش تبقا تيجى
regards
كلها اجيال
ربنا يفوكها من عندة
ويشيل القديمة ونشوف الجديدة
تحياتى
tamer
عفوا فنحن فى زمن العنب
regards
الله الله عليك يايوسف
ايه الحكم ديه يابنى
والله جميل كلامك
جمييييييييييل ورائع
ديه اول مرة ازور مدونتك وشكلها مش الأخيرة ان شاء الله
بالتوفيق
تحياتى واحتراماتى
عاشقة الوطن
أحرجتينى بحلو الكلام
ههههههههه
المدونة منورة وشكرا على مرورك
regards
كلامك بسيط بس بيجيب من الاخر يا يوسف
مدونتك جميله
دى اول زياره ليا عندك واكيد مش هتبقى الاخيره
تحياتى
remoo
شكرا على مرورك وتعليقك وخير الكلام ما قل ودل
ولية تاكل خص
خليك فى الجرجير والشبت افيد واصح
سلاموا عليكم
أقولك القصيدة جميلة..والخلاص من عند ربنا..يعني الحل الالهي..
اه، ألف مبروك عل المدونة الجميلة، وفي انتظار بوستات جديدة
محظوظة
على رايك الشبت بيقولو حلو لتساقط الشعر افيد واحلى نورتى مدونتى
صحيح نسيتى تكتبى هههههههههههه
اللى بتكتبيها فى كل تعليق
regards
aboud
صح السر الالهى يطلع وتخرب اكتر واكتر
شكرا على مرورك ونورتنى يا باشا
regards
حاج يوسف
عايز اقول مبارك
او مبروك
او اي تهنئة
بس النفس مسدودة
والايد ممدودة
وعشانا عليك يا رب
طهقان
طهقان باشا فى مدونتى يا هلا يا هلا وانا اقول ايه النور ده بردو
شكرا على مرورك يا باشا
أنت مبتجيش ليه مش تبقا تيجى
regards
يوسف باشا أنا دبستك في تاجين
ياريت تدخل عندي تاخدهم وتحلهم(:
ليك عندي تاج هديه
ابقي رد عليه بقي
البلوج جميل يا يوسف
ربنا معاك
مبارك على الجزمه ويا جمال الجزمه كمان
وسلملي على الاستفتاء
اسراء
علم وهينفذ يا سعادة الباشا
regards
shab 3adi
شكرا يا باشا على مرورك وربنا يكتر من مصطلحات الشباب عندك كمان وكمان
انت فاهمنى طبعا
regards
naryoma
يالهوى يالهوى تاج كمان حاضر علم وهينفذ وربنا يكتر من تاجاتكم يا رب
regards
klam faregh مع انى شايفه دايما مليان
والله المشكلة فى الجزمة مبقيتش عارفه
تشيل ايه ولا ايه الواحد عايز يجيبله جازمه سيفتى بقا
regards
جامدة جدا على فكرة
ايه الجمال دا
مبارك يابنى عالجزمة القديمة المعفنة
بس فعلا البوست جميل جدا
انت اللى مالفها ؟
جامد بجد دي يمكن أول مرة نعدي هنا
بس رائع يافندم
تحياتنا
اول زيارة لى ، حلو قوى بس فعلا لو بقينا معاك كلنا هنبقى تحت الجزمة
عدناااا
ازيك يا يوسف
أكيد يا بنى انت ماتقصدش تشتم الريس.. راجع نفسك كده اكيد لأ.. أصل الإنسان يا بنى ما ينفعش يرمى نفسه للأسد ويقول شجاعة .. بطلوا تهور بقى وامشوا جنب الحيط والدنيا هتبقى زى الفل
مصر جميلة والدستور جميل وقانون الإرهاب والطوارئ زى الفل .. والناس واخدة حريتها اربعة وعشرين قيراط ..
بطلوا افترا على الناس بقى
جوانا
شرفتونى بمروركم وربنا يوفقكم فى مجلتكم
regards
pakinam
على الجزمة ولا تحتها جنبها المهم ان فيه جزم كتير فى الموضوع
وعلى راى عمو انيس ما الدنيا الا جزمة قديمة
regards
أخف دم
تقريبا كده انا مبطلعش فعلا من بيتنا من يوميهايظهر ان اللى ييجى عالجزم يتعب
واقع على رجلى وبايظه ومفيش اتنين كيلو موز ولا اى حاجه من حد من المدونين
وعموما احلى باك يا قمر
regards
مبارك يابنى عالجزمة
هههههههههههههههههههههههههه
فعلا شكلك هتوحشنا يا يوسف
مش عايز مساعده ياخويا فى تحضير الشنطه
ولا هما هياخدوك باللى عليك هههههههههههههه
مدونتك جميله يا يوسف واحساسك فى الكلام تحفه
عشان انت بتختار كلمات سهله ومعبره وبتوصل بسرعه
ده أولا
ثانيا بقى بشكرك على تشريفك فى مدونتى وكلامك الجميل اللى قولته واهلا بيك فيها ودايما منورنى ان شاء الله وتقولى رأيك
ربنا يوفقك
بس بردو هتوحشنا ههههههههههههه
انجل ومش اى انجل
الشنطة ياختى عند الواد محمد ابو الروس خدها معاه ونام عليها من يوميها شاكلى هاخد هدومى فى ورقة جورنال
ثانيا انا مقلتش غير بجد اللى حسيته
keep up the good work
regards
اجكد حتة
مبارك يابنى عالجزمة
ربنا يغيرلنا الجازمة بقى عشان قدتمت و ريحيتها طلعت
سورى
و يجعله عامر
وكل ما الأيام تعدي يا يوسف كل ما الحالة هتسوء أكتر ولا باين لها مناديل ولا حتى قمصان ولا جزم وهنسف التراب وهنمشي حافيين ومش بعيد عريانين
والبركة في اللي كان السبب
وكل ما الأيام تعدي يا يوسف كل ما الحالة هتسوء أكتر ولا باين لها مناديل ولا حتى قمصان ولا جزم وهنسف التراب وهنمشي حافيين ومش بعيد عريانين
والبركة في اللي كان السبب
كلامك جميل وجه ع الوجيعة
ربنا يسترها معانا ومع اللي جايين
spellz
هيا كمكت بعقل ربنا يسهل لحسن ريحتها بقت وحشة قوى
regards
shams
نورتى مدونتى هو احنا لسه هنمشى عريانين ما خلاص الناس طلعت من هدمها
وعلى راى المطرب القذر الدنيا خربانة
regards
جميلة قوي
ههههههههه
حنسرح بمنديل
ما سرحنا خلاص
طهقانة
يا هلا يا هلا يا الف هلا بالست طهقانة اللى اى بوست تكتبه بيخلينى اقع على الارض من الضحك
شكرا على مرورك يا بسكوته
regards
كلامك جميل ودى اول مره باجى هنا
وادينا كلنا عايشين فمصر وشايفين خيرها مش لينا
واللى فيها مش ليها
تفائل بكره اكيد احلى:)
انا قلت أرد تانى على البوست ده عشان اقولك
فين جديدك يا باشا
مختفى ليه
اه يا خوفى لتكون رحت هناك
هههههههههههههههه
اسكت يا بوءى
hadota
انشاءالله مش هتكون اخر مرة نورتينا
regards
whiteangel
او بمعنى تانى أرّق أنجل انا ممتش ولا حاجه بس أنا غايب لسببين أولا كنت تعبان جدا الفترة اللى فاتت
ثانيا لانى بامتحن ادعولى
regards
Post a Comment