خدوا الحكمة من أفواه الكاميرونيين

من تعلم القتال يوم القتال ليصبحن مقتولا

الكلمة دى قالهالى واحد صاحبى كاميرونى دايما بنسى اسمه مبعرفش انطقه نهائى أصلى ولامؤاخذه بتكلم عربى مدغدغ المهم الواد قالى كلمة وأنا براجع قبل الامتحان أو بمعنى أخر بذاكر قبل الامتحان جزء لم يتم فتحه من قبل والعيال الاوباش صحابى قالوا ان ده هييجى فى الامتحان

الواد سألنى :ماذا تفعل ؟

قلتله :العملية مش نقصاك يا استاذ فصيح بس عموما بهرتل يا مولانا لعل وعسى حاجه من دول تيجى

سأل تانى:وما معنى الهرتلة؟

أنا : اللهم اصبرك يا روح مش وقت درس لغة دارجه فصحى خالص

الهرتلة يا بنى يعنى انك تبقا عارف انك خايب وبتقاوح(طبعا مفهوم الهرتله بيختلف من موقف الى اخر)فهمت

الواد:هذا يعنى انك تستذكر الدروس التى لم تستذكرها من بداية العام؟

أنا :أيوه هو ده يا عنيا

قام الواد فقعنى البؤ ده"من تعلم القتال وقت القتال ليصبحن مقتولا" قصده ان اللى يخش معركة (سواء امتحان او غيره) لازم يكون مستعد وانه يكون تعلم القتال او بمعنى اخر طرق الفوز يعنى قبل ما يخوض معركته لأنه لو حاول يتعلم القتال يوم الحرب لازم هينقتل بلا شك يعنى هيخسر هيخسر

أنا سمعت العبرة دى وفضل عقلى يضرب اخماس فى اسداس العبارة فعلا بليغة الى حد كبير لدرجة انى خفت انساها فكتبتها على ايدى لحد ما اروح البيت وفيه ناس لما شافو الكتابة على دراعى افتكرونى من بتوع التربية الفكرية وتحالا يا حبييبى اكيبلك شوخولاته

المهم ان السؤال اللى بيطرح نفسه هنا

يا ترى كام واحد فينا أتعلم القتال قبل ما يخوض معركته؟

لقيت أن معظمنا عمره ما اختار معركته وانه دايما بيلاقى نفسه فى موقع المعركة فجأة

يعنى فجأة يلاقى نفسه جوه الامتحان فجأة يلاقى نفسه بيحب فجأة......الخ

يعنى احنا جيل الفجأة اللى عمره ما اختار ويوم ما يختار هينضرب بالنار جيل قرر الفرار والبعد عن النار من أجل الحفاظ على دمه اللى فار جيل نفسه يبوح بأسرار لو راح يقولها من أول الليل لطلوع النهار عمرك ما هتمل بس اكيد هتنهار

اسف لو طولت بس انا طالب من كل اللى يشوف البوست ده انه يقول حكمة أثرت فى حياته اوى ده بجانب الكومنت