كومبارص فى الخامسة

الكومبارص؟

من كام يوم كده محمد ابن اخويا جه من المدرسة وعلامات الانتصار على وشه يا أخواتى هو والست والدته
وحمادة جاى مبسوط قوى أنه هيبقا ليه دور فى الدنيا دى
معلش يا جماعة عيل زؤنن وغلط ونفسه من زمان يبقا ليه دور فى الحياة
المهم حمادة ده فى كى جى 2 والدور بتاعه انه هيمثل فى مسرحية عملاها المدرسة بتاعته
طبعا لما سمعت ده انا كمان فرحت ان ابن اخويا هينافس احمد عز والواد توم كروز والسقا
والنجوم الكبار دول وقال ايه الميس بتاعته طلبت من مامته انه لازم ييجى ومينفعش يغيب لحسن المسرحيه تبوظ
وان حماده لازم يحفظ دوره كويس جدا
طبعا بعد ما سمعت ده كله سرحت بخيالى وقلت يا ترى المسرحيه دى بتتكلم عن ايه
عنن العيال اللى بتتدبح فى فلسطين وحماده هيعمل نفسه فدائى ولا عن العيال بردو اللى بتندبح
فى العراق برو وهما صغيرين ولا العيال بتوع مصر اللى انقتلم تحت ايد الاسطى التربينى
المهم مشغلتش بالى وقلت يمثل اللى يمثله اهو المهم ياخد دور فى الحياة ويبقا ستار اد الدنيا وكده
ومرت الليالى وذات يوم
دخل عليا حمادة وابتسامته من الودن للودن يعنى تيبك الاصل كده بوجى
وقالى انا مثلت الدور يا عمو واخدنى بالحضن واشتغل نشيد المصريين اهما وقلت فى سرى
عملوها الوحوش يا ريتنى كنت معاهم
حماده بقا ستار يا رجاله يعنى نجم كبير وهتلعب معاه البليه بقا وهنعيش ومش بعيد يمثل فى اعلانات كادبورى
وناكل شيكولاته بالعبيط لا وايه ببلاش كمان
او يجيله دور جنب ميغ رايان حبيبة قلبى ولا كاترينا زيتا جونز ويبقا حماده الشريف اخو اونكل عمر
نرجع لموضوعنا بقا
سألته :هاه يا حبيبى ودورك كان ايه يا باشا؟
فبصلى وعلامات النبوغ على وشه وقالى : كشك
قلتله نعم ازاى يعنى يا حبيبى يعنى وقفوك كشك ولا عملت ايه
قالى : لا أنا وقفونى فى كشك وبعت جرايد وقصص وكده
اترسمت علامات البلاهه على وشى انا بقا وقلتله :يعنى هو ده الدور
قالى : اه
قلتله يعنى نطقت اتكلمت اتنطط عملت اى حاجه غير كده
قالى: لا لا لا أنا كشك وبس متكلمتش
قلتله : أهلا يعنى كومبارص هيا العيله ناقصه كومبارصات ده العيله كلها ولا مؤاخذه لا مش العيله بس
الشعب كله كومبارصات ولا احب افكركم بموال الانتخابات اللى احنا كنا فيه وصوطنا مش صوتنا
بأعلى حسنا وقال ايه صوّت من اجل التغيير وفى الاخر محصلش حاجه
وكله قفل بؤه من تانى وفضل كومبارص
المهم انهم ضحكم على حماده وادوله نوبايل يلعب بيه نوبايل هديه عشان اى حاجه تلهيه عشان ميفكرش
او يشغل دماغه فى اى حاجه نهائى
يعنى حماده ابن اخويا تقربيا كده قام بتمثيل دور اكبر من سنه مع انه هيمثله هيمثله
حمادة ابن اخويا تقريبا كده رمز للشعب اللى بيلبسوه اسمه ايه فوق دماغهم (الطرطور)
يعنى حمادة رمز ل75 مليون مصرى
لما جه ابوه (ابو حماده) قلتله تاعلى يا ابو ال ستار يعنى يابو النجم الكبير
شوفت مش ابنك مثل دوره فى المسرحيه
قالى: ودوره كان ايه فى المسرحيه عمل حرامى
قلتله بس انت كده جبت الخلاصه ماهو اصل بلدك دى
لازم تبقا فيها حاجه من اتنين
ياتبقى زى حمادة يعنى كومبارص وتقفل بؤك
ياتبقا حرامى وتملا جيوبك
وزى ما قال عمنا ابو النجوم احمد فؤاد نجم
يا شعب ثور داهية تسمك
وشيل اصول اسباب همك
عصابة
بتمص فى دمك
شقع بقع يا ديل الفار
يالا اشوفكم على خير يا شعب المخروصة

قتلوه بعد ما ربوه

يومك قرب يا مهيتاب ؟

كله طبعا عارف مين ماهيتاب مذاكرين ولا لا يا ريت تكونم فاكرين أن ماهيتاب ده الخروف بتاعنا أبو قرون كبيرة اللى هنضحى بيه فى العيد
المهم يا جماعه المنظر كالاتى فى موقع الاحداث بلغة قناة الجزيرة
مهيتاب غلبان فى نفسه أخويا الكبير ماسك سكينه وأخويا اللى اصغر منه وبابا وماما وخالو كمان
العيله كلها ماسكه سكاكين عشان خاطر ماهيتاب الغلبان
معلش اصل انهارده اول ايام العيد وهندبح وبما انى بخاف من الدم فمش هقف معاهم وهما بيدبحم
المهم ان انا بصيت على الموقف ومستغرب يااااااااه بقا البشر دى كلها على ماهيتاب
اللى بيعرف يدبح واللى مبيعرفش كله ماسك سكاكين وعايز يقوم بدوره عايز يدبح اى حاجه عشان يشفى غليله متعرفوش ولا ايه
ومهيتاب طبعا غلبان قاعد مستنى يندبح اصله من يوم ما اتخلق وهو عارف أن مسيره الدبح لأنه خروف ابن خروف وعشان خروف فمجرد ما هيقع السكاكين هتكتر عليه لا كمان مش مهم يقع ولا دياولو
لانه كده كدهه هيندبح او بمعنى اصح هو مدبوح من يومه
أصل ماهيتاب مش لاقى المم عشان الكبير مجوّعه ماهيتاب مش لاقى الشرب عشان الكبير معطشه
ماهيتاب كان عنده أمنيه نفسه يحققها انه يبقا فى يوم من الأيام خروف بوليسى
ويلتحق بسلك الشرطة اشمعنا الكلاب بس بيتعينم فى الشرطة وهو لأ مع انه خروف وهما كلاب والخروف افيد من الكلب أقله هيندبح ويتاكل لان اكل الخرفان حلال لكن الكلاب محدش بيقدر عليهم
ماهيتاب ضاع منه كل حاجه فهو مش لاقى ياكل ولا يشرب ولا أمنيته اتحققت
لا وايه بعد ما رضى بحاله بعد ده كله لقا 100 سكينة نازله عليه فى اول مناسبه
مش عارف اقول ايه بس انا حطيت نفسى مطرح مهيتاب وقلت أفكّر بعقلية الخروف شويه
ولامؤاخذة أصل أنا والخروف اييييييييه؟ أصحاب بقا (مشوها اصحاب)
لقيت أن من حقه يكره الدنيا ويشوفوها بلاك يعنى عمره ما كان ليه حد يخاف عليه ولا يلاعبه
وعطووول بياخد على قفاه من ايام ما كان عند الغنام اللى بيربيه
ويوم ما يلتحق ببيت يقدموله فيه كل حاجه والأكل مختلف الوانه
(ايشى برسيم وايشى تبن وايشى كرواسو بالدره)
ييجم بعد ده كله ويدبحوه يااااااااااااااااااااااااااه
أنا شفت فى عيون مهيتاب حسرة كل شاب وبنت مصرى او مصريه
على الحال المايل واللى هما فيه حتى لو لقيم حضن يستريحم فيه
مسيرهم فى يوم يندبحم من الحضن ده عشان ياكله ويستفيد منه
الكلام ده بجد أنا بقوله دلوقتى وقلبى بجد عمال يبكى على حالنا كلنا معلش يا جماعه
أصل دموع القلب دى صعبة موووووووت بتبقا مؤلمة قوى

(ملحوظة: بالنسبه لدبح الاضحيه لو فى حد من الأسرة يقدر يدبح وكده يعمل ده ولو مبيعرفش يكفيه انه يشط رقبة الخروف بس والجزار يكمل لان دى سنة عن الرسول صلوات الله عليه وسلم وموضوع الدبح فى الموضوع مجرد تشبيه ومجاز وافتكر انكم عرفتم وجه الشبه)

اشوفكم على خير

جيبنا ماهيتاب

جيبنا ماهيتاب

أيوه يا جماعه لازم تباركولنا مش جبنا ماهيتاب اه والنعمه طبعا كله بيسأل مين اللى جاب مهيتاب؟
أقولكم أنا مهيتاب دى بابا وأخويا الكبير وخالو جابوها
يا ريت محدش يفهمنى غلط او يؤول ان احنا عيله لامؤاخذه لا والله ابدا احنا عيله كويسه وبناكل هامبورجر
ماهيتاب دى بقا الخروف بتاعنا اه يا عم الخروف بتاعنامش الخروفه يعنى ماهيتاب ده ميل ابن ميل
يعنى ولا مؤاخذه ذكر
المهم ليه سميناه ماهيتاب ده ليه عدة عوامل سنسردها كالتالى(حلو حوار السرد ده يا عينى عليا وانا مثأف)
أول حاجه لأن احنا حسينا ان عنده كبرياء يعنى مبيتعاملش مع المواطنبن العاديين الا اللى يسبله تحت الترابيزه او اللى معاه توصيه واللى يقوله صباح الخير يا باشا وطبعا كمان لان احنا حسينا ان مهيتاب واخده وضعها والبريستيج بتاعها بحيث كده تحس ان فيه وجه شبه ما بينها وبين بتوع المصالح الحكو ......
(بلاش سياسه بقا ده احنا لسه بنقول ياهادى ييجم اسمهم ايه يقفلوهولنا)
ننتقل على اللى بعد كده اللى هو السبب التانى
السعر: لقيت ان ما ينفعش نطلق عليه لفظ خروف نظرا لقيمته لان الحاج جابه بييجى 1600 لحلوح مصرى
(يعنى بالجنيه الفيومى كتير اوى متعدش). فاستغربت لما ابويا قالى على سعره
(قصدى بابى أصل احنا عيله كلاس بناكل همبورجر ومبسوطين طول النهار نضحك)
ماهيتاب سعره 1600 جنيه فقارنته بلتعويضات بتاعت الحوادث اللى بتحصل فى مصر
(حوادث بالعبيط)واللى الحكومة صرفت فيها 500 للمصاب ومش عارف الف ولا تلاته للمتوفى
(طبعا هو مش هياخد حاجه لأنه متوفى يعنى هينيل بيهم ايه)قصدى لعائلة المتوفى وموت يا دونكى على ما تصرف التعويض
يعنى البنى ادم هنا فى مصر كبيره يساوى خمسميايه ولا الف لحلوح وبس
وماهيتاب ب1600 لحلوح بصم من 1 و 2 ينتج أن:
كلنا ماهيتاب وان ماكنش اقل
اشوفكم على خير

مقدمة

هاى يا جماعه انا انشاء الله جايبلكم مواضيع يا رب تعجبكم اولها موضوع كان مفروض يتنشر قبل العيد وموضوع فى العيد بس نعمل ايه بقا المهم كل واحد فيكم يركب الة الزمن بتاعته ويرجع كده بالزمن عشان يحس بالموضوع اوك يالا نبتدى باسم الله